Չեմպիոնների լիգայի 1/4 եզրափակիչ փուլի պատասխան խաղում «Բավարիա»-ն սեփական հարկի տակ 3:1 հաշվով կամային հաղթանակ տարավ «Մանչեսթեր Յունայթեդ»-ի նկատմամբ և դուրս եկավ կիսաեզրափակիչ փուլ:  Խաղի բոլոր գոլերը գրանցվեցին երկրորդ խաղակեսում: 57-րդ րոպեին հյուրերը Պատրիս Էվրայի գեղեցիկ գոլի շնորհիվ առաջ անցան հաշվի մեջ: Սակայն մանկունիանցիների ուրախությունը երկար չտևեց, քանի որ ընդամենը երկու րոպե անց «Բավարիա»-ն Մանջուկիչի դիպուկ հարվածից հետո վերականգնեց հաշվի հավասարակշռությունը:  Գվարդիոլայի թիմը խփած գոլից հետո հոգեբանական առավելություն ստացավ և սկսեց մեծ ճնշում գործադրել մրցակցի դարպասի ուղղությամբ: Մյունխենցիների ջանքերը հաջողությամբ պսակվեցին 68-րդ րոպեին, երբ Արյեն Ռոբենի փոխանցումից հետո Թոմաս Մյուլլերը առաջ մղեց իր թիմին: Դիմակայության ելքը վերջնականապես վճռվեց մյունխենցիների երրորդ գոլից հետո: 76-րդ րոպեին Արյեն Ռոբենը իրեն հատուկ ոճով խոցեց Դավիդ Դե Խեայի պաշտպանած դարպասը:  
Հիշեցնենք, որ այս թիմերի միջև առաջին խաղը ավարտվել էր ոչ-ոքի` 1:1 հաշվով:

«Բավարիա» - «Մանչեսթեր Յունայթեդ»` 3:1
Գոլեր` Մանջուկիչ 59', Մյուլլեր 68', Ռոբբեն 76' – Էվրա 57'