Բունդեսլիգայի 30-րդ տուրում և մրցաշրջանի կարևորագույն խաղում Դորտմունդի Բորուսիան սեփական հարկի տակ ընդունել էր երկրորդ հորիզոնականում ընթացող Մյունխենի Բավարիային: 

Մինչ այս խաղը թիմերին միմյանցից բաժանում էր երեք միավոր: Խաղից առաջ այնպիսի իրավիճակ էր ստեղծվել, որ կողմերից մեկի հաջողության դեպքում չեմպիոնության հարցը կարելի էր լուծված համարել: Եվ այդ հաջողակ արժանիորեն դարձավ Բորուսիան, որը հանդիպման վերջնամասում Լևանդովսկու խփած միակ գնդակի շնորհիվ նվազագույն հաշվով հաղթանակ տարավ մրցակցի նկատմամբ և ամենայն հավանականությամբ նվաճեց չեմպիոնի տիտղոսը:

 Ճիշտ է Բավարիան կարող էր հանդիպման վերջնամասում խուսափել պարտությունից, եթե 11 մետրանոց կարողնար դիպուկ իրացնել Արիեն Ռոբենը, սակայն հոլանդացու նյարդերը տեղի տվեցին: Մրցավարի կողմից ավելացրած վերջին րոպեին Բավարիան կրկին շանս ստացավ խույս տալու պարտությունից, սակայն հուսահատված Ռոբենը հարմարավետ դիրքից հրաշքով չգրավեց Վայդենֆելլերի դարպասը:

Անհաջողության համար Բավարիան առաջին հերթին  պետք է ինքն իրեն մեղադրի, քանի որ ողջ հանդիպման ընթացքում մյունխենցիները հաղթանակի հասնելու համար անհրաժեշտ ճնշումն ու ագրեսիվությունը չդրսևորեցին, չցուցադրեցին այն ֆուտբոլը, որը հարիր է չեմպիոնին: Չնայած, որ առաջնության ավարտին 4 տուր է մնացել, այդուհանդերձ 6 միավորի առավելություն դորտմունդցիները դժվար թե ձեռքներից բաց թողնեն:

Այսպիսով Բորուսիան հստակ քայլ կատարեց դեպի հերթական չեմպիոնական տիտղոսը, ընդ որում երկրորդ տարին անընդմեջ: Ինչ վերաբերվում է Բավարիային, ապա թիմին մնում է կենտրոնանալ Չեմպիոնների լիգայի և Գերմանիայի գավաթի խաղարկությունների վրա: Հիշեցնենք, որ Բավարիան դուրս է եկել եվրոպական ամենահեղինակավոր գավաթի կիսաեզրափակիչ, ուր առաջիկա երեքշաբթի օրը ուժերը կչափի Մադրիդի Ռեալի հետ, իսկ Գերմանիայի գավաթի եզրափակիչում Բավարիային հարկ կլինի կրկին անգամ հանդիպել Դորտմունդի Բորուսիային:

«Բորուսիա» Դ – «Բավարիա» 1:0

գոլ` Լևանդովսկի, 77 (1:0)

«Նյուրնբերգ»  – «Շալկե»  4:1

գոլեր` Բալիչ, 25 (1:0); Սիմոնս, 37 (2:0, 11մ); Դիդավի, 45 (3:0); Հոլթբի, 85 (3:1); Դիդավի, 87 (4:1)

«Հոֆենհայմ» – «Համբուրգ»  4:0

գոլեր` Վեսթերգոր, 17 (1:0); Սալիհովիչ, 25 (2:0, 11մ); Ջոնսոն, 51 (3:0); Շիպլոկ, 59 (4:0)

«Բայեր» – «Կայզերսլաուտերն»  3:1

գոլեր` Կսիլինգ, 1 (1:0); Դերստրոֆ, 42 (1:1); Ռոլֆես, 57 (2:1); Ռայնարց, 69 (3:1)

«Հաննովեր»  – «Վոլֆսբուրգ»  2:0

գոլեր` Դիուֆ, 44 (1:0); Յա Կոնան, 77 (2:0)