Չեմպիոնների լիգայի ընթացիկ խաղարկության գլխավոր սենսացիայի հեղինակ` Բազելը սեփական հարկի տակ` այսօր կընդունի Մյունխենի Բավարիային: Բազելը առանց այդ էլ իր գլխից բարձր է ցատկել, քանի որ խմբային փուլում կարողացավ պարտության մատնել ահեղազոր Մանչեսթեր Յունայթեդին և դուրս թողել հետագա պայքարից: Ինչպես ասում են` ախորժակը ուտելուց է բացվում:Թե որքանով է մեծ շվեյցարական ակումբի ախորժակը հեշտ չէ կռահել, սակայն այն որ Բազելը փորձելու է  դժավարացնել Բավարիայի գործերը դա կանխատեսելի է:

Հեյկո Ֆոգելի սաները հանդիպմանը կմոտենան բավականին դրական տրամադրությամբ, քանի որ երկարատև ընդմիջումից հետո վնասվածքներից շարք են վերադարձել կիսապաշտպանության առաջատարներ` Յապո-Յապոն և Շտոկերը, սակայն նրանց փոխարինող երիտասարդ Ջական և Ֆաբիան Ֆրայը այնքան հաջող փոխարինեցին նրանց, որ հարցական է` արդյոք շարք վերադարձած ֆուտբոլիստները կնդգրկվեն հիմնական կազմում, թե ոչ: Բացի այդ էլ երկու ֆուտբոլիստները դեռևս չեն գտնվում համապատասխան մարզավիճակի մեջ` ուստի կարելի է ենթադրել, որ նրանք մեկնարկային կազմում չեն ընդգրկվի: Հավանաբար Բազելը Բավարիայի դեմ հանդես կգա այն նույն կազմով, ինչ երկու ամիս առաջ կայացած Մանչեսթեր Յունայթեդի հետ խաղում: